عمري 30 ولكن احس اني 17 بسبب اهتماماتي البسيطة متل انشاء مواقع والاهتمام بالاجهزة الالكترونية والاغاني الفايعه على قولتنا احنا اهل الاردن يعني الاغاني الكوووووول اللي تخليك تنهبل وتموت عنفسك من الضحك و 45 سنة من الهموم كانها غيمة سودة عليها جهاز استشعار وين ما اروح وراي ما بتتركني بحالي. بدت مشاكلي من الطفولة على ما اعتقد, كنت دلوعة البيت واصغر وحدة والكل يحبني ويشتري الي الالعاب, عندي ذكريات راائعه جدا عن طفولتي الى الان ما نسيتها وافضل اتذكرها لانها الجزء الاول الوحيد بحياتي حلو. وبعديها كبرت, امي الله يرحمها كانت كتير تخاف علينا تعقدنا بصراحة من الخوف من كل شي من المجتمع من الشباب من كل شي, يعني متل اي عائلة تقليدية بسيطة بتخاف عبناتها من الكلام. كنت من المتفوقات بالمدرسة وعندي طموح دراسي كبير لكن ما قبلو يدخلوني جامعه لانه كل الجامعات اللي في الاردن مختلطة وطبعا الاختلاط ممنوع في بيتنا, اضطريت اني اسجل كلية دبلوم وهي نفس الجامعه ونفس المقررات لكن التعليم يكون فيها مكثف. هذي كانت اول حسرة بحياتي اني ما عملت اللي نفسي فيه وضيعت حياتي بالحسرة التانية اللي هي زواجي الفاشل اللي رح اتكلم عنها بعدين, لكن اللي بدي اوصله انه الخوف من كلام الناس والمجتمع اله تاثير كبير جدا على نفسية الانسان والمشكلة الكبرى انه اهلنا عرفو ولله الحمد يربونا يعني المسالة مو مسالة شك ,المشكلة انهم بدهم يضلو يعاملونا كانه عمرنا ثلاث سنوات بحيث انه اي قرار يواجهه بعدين ما رح يقدر يتخذ قرار سليم اولازم يمشي على شور اهله وبالتالي تضيع سنوات من عمر الانسان وفرص ولا عمره رح يلاقيه مثلها, فيضطر للاستسلام للواقع المرير, او يلحق الباقي من عمره وينجز الاشياء اللي كان نفسه يعملها زمان لكن ما حصلت له فرصة. متل ما صار معي :).
طبعا هذا جزء بسيط جدا من الماساة وهي جدا بسيطة مقارنه في الباقي, لكن جبيت ابلش المدونة بكتابة كل الامور السلبية بحياتي واتمنى انه غيري كمان يقدر , لانه مجرد الاعتراف والبوح بمأساتك, فانت اكيد طلع على اول السلم, السلم اللي رح يوصلك لراحة البال ومعرفة الذات.
ليست هناك تعليقات:
إرسال تعليق