نبذة بسيطة عن همومي الجزء الثاني

تكلمت مسبقا عن حسرتي الاولى وهي اني ما انجزت كتير بدراستي الا الكلية وما كان كافي بالنسبة لي, نجي للهم التاني الشيء المنتظر اللي كل البنات تتمناه: بيت وزوج واولاد. بداية انا ما اتكلم انه كل الرجال متل بعض في نسبة كبيرة من الرجال المحترمين في المجتمع, لكن تقابله نسبة كبيرة من الرجال اللي اقل ما يقال عنهم انهم "مش اولاد حلال". تزوجت وانجبت ولدين زواجي استمر تسع سنوات, من اليوم الاول مشاكل لكن تحملت,  قلت ما عليه مع اني مو متعودة على وجع الراس عند اهلي, اهلي دللوني وتوقعت اني الاقي زوج مثل والدي او اخوي لكن طلع العكس . استحملت وبدت المشاكل تزيد بعد سنتين تحديدا لكن ما عمري اعتبرتها مشاكل , لاني بطبعي الصبر وانا ولله الحمد صبورة واتحمل الصدمات. لحد ما انحرمت من اهلي وهو السبب , ووفاة والدتي وانا منقطعه عنها زاد الطين بلة, صابني اكتئاب حاد وبنفس اليوم لوفاة الوالدة اكتشف خيانة زوجي لي!!!! ما فيه كان صدقا اصعب من هيك موقف, ما عرفت احزن على مين, على والدتي اللي قطعتها عشان زوجي يفرح, ولا عشان خيانة زوجي لوحدة ما بتسوى.

بعد مرور ست شهور قررت اسامحه واسامح نفسي لكن هو ولا تغير مع اني كنت ربة بيت من الدرجة الاولى والله الحمد جميلة واهتم بنفسي والاكثر من هيك اني كنت وفيه وصادقه بمحبتي له, لكن هو ما فكر يتغير, ما حس بتانيب الضمير على اللي عمله فيي, بالعكس زادت الامور عن حدها وربي يشهد علي اني حاولت اصلح واصلح واصلح لكن بدون فايدة. هذي مشكلتي اني انسانة مكافحة ما اقبل الهزيمة وما اقبل انه يخرب بيتي بسبب اشكال منحطة, والمشكلة اني كنت الوم نفسي كنت دايما احط الخطأ علي انا مو عليه, لحد ما اكتشفت انه اللي فيه مرض ادمان مو نقص فيي, حاولت اكلمه وقلتله مستعدة انسى كل شي لكن انت جرب وتغير, لكن لا اعوذ بالله كيف رجل يسمع كلام "مرة" او "حرمة" , عيب ما بصير لحد ما انا تعبت وصابتني الامراض والوساوس والاصعب الشك. صرت اشك باي حاجة, ما قدرت اكمل معه لانه الوضع تأزم اكتر من هيك ووصل للعنف بالنهاية تجرأت وتركته. تخيلو اني كنت افكر اتركه من خمس سنوات, يعني اخذ مني تفكير بالموضوع خمس سنوات. مرات احس اني بليدة لاني اخدت كل هالوقت بالتفكير, ومرات احس انه القرار الصحيح, بالرغم من كل مشاكلي وهمومي لكن حاولت اصحح عالاقل انه ربنا عالم فيي اني ما قصرت.

احب وانوه اني ما اشجع احد على الطلاق لكن بمجرد المعرفه انه فيه طرق وحلول وبدائل للطلاق, وطبعا حسب كل رجل فيه رجال سهل التفاوض معها وممكن يخجل من اهلها ويتصلح الوضع, وفيه رجال لا خجل ولا تربية  ولا خوف من رب العالمين هدول المجموعة الاخيرة يفضل الطلاق منهم لانهم بخلوكي تموتي وانتي عايشه. فالافضل تعرفي زوجك من اي قائمة واتمنى ما يكون من النوع الاخير اللي اتمنى من كل قلبي انهم ينقرضوا من وجه الارض ويريحو الناس من شرورهم